Policia e Tiranës ka dal me një njoftim pasi ndoqi një automjet në zonën e Vasil Shantos, pasi dyshohej se drejtuesi i automjetit kishte armë.
Forcat “Shqiponja” i bënë shenjë ndalimi një automjeti tip “Audi Q8”, në të cilin ndodheshin dy persona, pas dyshimeve se mund të ishin të armatosur.
Drejtuesi nuk iu bind urdhrit të Policisë, vijoi lëvizjen me shpejtësi, përplasi tre automjete dhe më pas, së bashku me pasagjerin, braktisi automjetin në rrugën “Moskat”.
Autoritetet bëjnë me dije se gjatë ndjekjes, dy të rinjtë kanë përplasur me makinë tre automjete të tjera, teksa më pas kanë hedhur armën e zjarrit pistoletë në rrugë dhe janë arratisur.
Por pasagjeri në mjet, Skerdi Sina është arrestuar ndërsa drejtuesi i mjetit është identifikuar dhe po punohet për kapjen e tij. Skardi Sina është një emër i njohur për policinë pasi disa muaj më parë, ishte në mesin e disa të rinjve që mbajti peng një 21 vjeçare në Astir.
Njëkohësisht ai është shok i Aleksandër Sadikajt, i cili u vra në një atentat në vitin 2022 .
Njoftimi i policisë:
DVP Tiranë
Nuk iu bindën urdhrit të Policisë, përplasën 3 automjete gjatë tentativës për t’u larguar, braktisën automjetin dhe hodhën në rrugë një armë zjarri, Forcat e Posaçme “Shqiponja”, vë në pranga njërin prej tyre dhe vijon puna për kapjen e shtetasit të dytë, i cili dyshohet se ishte drejtuesi i automjetit.
Rreth orës 16:30, në zonën e “Vasil Shantos”, shërbimet e Forcës së Posaçme “Shqiponja” i bënë shenjë ndalimi një automjeti tip “Audi Q8”, në të cilin ndodheshin dy persona, pasi kishin dyshime të arsyeshme se personat në automjet mund të ishin të armatosur. Drejtuesi nuk iu bind urdhrit të Policisë, vijoi lëvizjen me shpejtësi, përplasi tre automjete dhe më pas, së bashku me pasagjerin, braktisi automjetin në rrugën “Moskat”.
Gjatë largimit, dyshohet se këta shtetas hodhën në tokë një armë zjarri pistoletë, e cila u sekuestrua dhe do të dërgohet për ekzaminime të mëtejshme.
Si rezultat i ndjekjes nga shërbimet e Policisë, u bë e mundur kapja dhe shoqërimi në ambientet e DVP Tiranë i pasagjerit në automjet, shtetasit S. S., 29 vjeç, të cilit, gjatë kontrollit fizik, iu gjetën një krehër dhe municion.
Ndërkohë, është bërë identifikimi i drejtuesit të automjetit dhe vijon puna për lokalizimin dhe kapjen e tij.
Grupi hetimor i ngritur për rastin po vijon veprimet për zbardhjen dhe dokumentimin e plotë të kësaj ngjarjeje.