Zyrtarët doganorë në Kroaci kanë zbuluar 11 pushkë automatike në automjetin e një shtetasi nga Kosova.
Armët u zbuluan gjatë kontrollit të një automjeti mallrash, i përdorur për transportimin e makinave, me targa të Kosovës në pikën kufitare Tovarnik afër Vukovarit.
Gjatë inspektimit të detajuar të një prej makinave të dyshuara në mjetin transportues, përveç 11 pushkëve automatike, u gjet edhe municioni përkatës.
Mediat në Kroaci shkruajnë se drejtuesi i mjetit dhe një pasagjer në mjetin e transportit, shtetas të Republikës së Kosovës, po udhëtonin për në Zvicër.
Policia kroate pritet të referojë kallëzim penal për dy shtetasit nga Kosova.